O Recanto do Corcovado adica o primeiro programa da tempada 2021-2022 a distintos proxectos galegos que foron estreados ao longo do pasado verán.
Abrimos en clave trad con “Figa”, a nova canción das Tanxugueiras. Nela, o tradicional hibrídase cos sons urbanos dun xeito tan hábil coma sorprendente. Conectámolo coas estreas de “Peixe”, o novo disco de Xisco Feijoo, e “Aire!”, o máis que elegante primeiro disco do dúo Caamaño & Ameixeiras. Na segunda parte do programa mudamos de orientación temática para nos adentrar no ámbito do jazz. Escoitamos dous temas de “Portus Apostoli”, a nova gravación do Atlantic Bridge Jazz Project. Converxen na dirección do proxecto os talentos de Alberto Conde (piano) e Kin García (contrabaixo). Pechamos o programa con “Límbico”, o novo proxecto do guitarrista afincado en Vigo Iago Marta.
